Татарстан Республикасы фольклор музыкасы Дәүләт ансамбленең концерты татар фольклоры нигезендә ясалган вокаль, хореографик һәм инструменталь концерт номерларыннан тора. Татарстан Республикасының фольклор музыкасы Дәүләт ансамбле музыка дөньясында үзенең универсальлеге белән аерылып тора: артистларның һәрберсе профессиональ дәрәҗәдә җырлыйлар, бииләр, төрледән-төрле музыка уен коралларында – гармунда, курайда, кубызда, борынгы уен кораллары – гөслә, саз, сорнай, думбыра, ятаган, җәя, давылда уйныйлар. Узган сезонда коллектив үзенең 25 еллык юбилеен билгеләп үтте. Ансамбль репертуарындагы беренче куелган әсәрләр белән беррәттән, концертта, театральләштерелгән тамашалар рәвешендә, яңа номерлар да тәкъдим ителәчәк. Һәр чыгыш югары профессиональ дәрәҗәдә камилләштерелгән. Концерт номерлары тере башкаруда тәкъдим ителә. Шулай ук ансамбльнең сәнгать җитәкчесе Айдар Фәйзрахманов башкаруында да җырлар яңгыраячак.
Концертны алып баручы – ансамбльнең сәнгать җитәкчесе, Россиянең атказанган артисты, Татарстан Республикасының халык артисты, Татарстан Республикасының Габдулла Тукай исемендәге Дәүләт премиясе лауреаты, профессор Айдар Фәтхрахман улы Фәйзрахманов.